Kooperatiba iti Ilocos Norte, mapapigsa

LAOAG CITY, Abril 29 (PIA) – – Ad-adda pay a mapigsa dagiti kooperatiba iti Ilocos Norte babaen ti tulong ti lokal a gobierno iti baet a kabaelanen dagiti kameng nga iwanwan ti bukodda nga organisasion ditoy.

Daytoy ti impanamnama ni Domingo Ambrocio, agdama a presidente ti Philippine Councilor’s League (PCL) – Ilocos Norte chapter ken chairman ti Committee on Agriculture and Cooperative iti Sangguniang Panlalawigan, kabayatan ti taripnong dagiti dadaulo ti kooperatiba ti probinsia nga inatendaran ti Cooperative Development Authority (CDA) itay nabiit.

Kinunana a nakasagana ti gobierno ti probinsia babaen ti panangidaulo ni Gobernador Imee Marcos a mangipaay iti aniaman a tulong a kiddawen dagiti kooperatiba kas koma iti benneg ti pinansial wenno panangisponsor ti panagsanay dagiti kameng.

“Babaen ti sistema ti kooperatiba, ad-adda pay a dumur-as ti ekonomia ti probinsia,” kinuna.

Tapno mapasingkedan ti agtultuloy a panagtitinnulong ken pannakasuporta dagiti amin a kooperatiba iti Ilocos Norte, plano ni Ambrocio ti mangbuangay ti maysa pederasion daytoy a sektor iti probinsia.

Planona pay ti mangilungalong ti pannakaipaay ti insentibo kadagiti maibilang a “top performers” a kooperatiba iti probinsia.

“Babaen iti daytoy a wagas, ad-adda pay nga agbalin nga aktibo dagiti amin kooperatiba iti Ilocos Norte,” kinunana.
Pinadayawanna dagiti dadaulo ti sumagmamano nga aktibo a kooperatiba iti probinsia a nabuangay iti ili ti Sarrat, San nicolas, Pagudpud,Bangui, Solsona, Bacarra ken iti siudad ti Laoag. (Freddie G. Lazaro/PIA- 1)