Agarup 86 porsiento kadagiti amin a pada a Filipino iti maipagarup a naburiboran (na stressed iti sa-o nga English) gapu iti coronavirus 2019 (COVID-19) pandemya.
Basar daytoy iti kaudian a mobile survey seknan dagiti na-stressed nga umili a nagbalin a respondents a nagsaludsodan iti Social Weather Station a naisayangkat idi Hulyo 3-6, 2020.
Bimmabassit iti tallo puntos kumpara ti resulta iti survey nga 89 porsiento idi bulan ti Mayo ita a tawen.
Patien tay man wenno haan ti nasa-o a survey ti SWS, makita ken marikna ti agpayso a kasasaad ti padatayo nga umili gapu ti agdama a krisis a parnuay iti COVID-19.
Gapu iti lockdown ken kuarantinas iti sumagmamano a bulan, naruay a tatta-o iti naawanan iti trabaho. No work, no pay.
No adda man urnong a kuarta iti maysa a pamilya, in-inot a naasoten para iti inaldaw a taraon ken dadduma pay a paggastuan nangnangruna ti agas weno medisina.
Di mailibak nga adu a pampamilya idiay Metro Manila iti nakapadas iti panagbisin gapu iti kaawan iti makan.
Agingga ita nga agdama, parikut latta iti gobierno no kasano a maalay-ayan iti panagbisin dagiti naruay a tatta-o a naawanan iti trabaho.
Nagasgasat tay nga adda iti probinsya ta ditay pulos ipalubos nga agbisin dagiti kameng ti pamilya tayo.
No adda pinuon a marunggay, sibbual iti rabong, susop wenno sabunganay iti saba, mula a saluyot ken natnateng, taraken a manok ken dengwen, agbiag kan ken ti pamilyam.
Ditay maikkat nga adda latta panakaburibor iti panpanunot gapu iti COVID-19.
Agpannuray koma iti positibo a panirigan ti agdama a panagbiag.
Nalabit, amin dagitoy ket pannubok ni Apo Dios kadatayo, no kasano iti kinatibker iti pammati tayo Kenkuana nga isu ti nangparsua ti sangalubongan.# (jrg)
