SERBISYO TI DANUM DITOY LAOAG, ET AL OKAY…NGEM DITA PAOAY, SUS!

Awan ti parikut ti supply iti danum ditoy Laoag City ken kabangibangna ti agdama ken ti masungad a kuaresma wenno tiempo iti kalgaw (summertime). Dagita ti nalawag a balikas ni Ilocos Norte Water District General Manager Engr. John Teodoro.

Dagiti rinibu nga INWD concessionaires wenno agkonkonsumo ti danum ditoy luglugartayo ti maragsakan a nakaammo kadatayta nga inbrodkas ni GM Teodoro iti media.

Ngamin no idasig tayo ti sitwasyon idiay Metro Manila maipanggep ti supply iti danum, amang a nagasgasat tayo ditoy probinsya.

Ita ta masungad ti kalgaw wenno Summer, maburiburan manen dagiti naruay a Manilenios gapu ta rimmuar ti damag maipanggep ti mapattapatta a panagkisang to manen ti supply iti danum nga agturong kadagiti bukodda a pagtaengan, opisina ken business establishments idiay ka-Manilaan.

Adda tiempona itay kallabes a nagsagaba dagiti taga-Metro Manila ti acute shortage of water supply wenno nakaro a panagkisang ti supply iti danum.

Dandani aginaldaw a nagpipila piman dagiti tatta-o nga agitaya ti timba ken plastic containers tunggal agsursuro dagiti truck iti bombero tapno agrasyonda ti danum a mausar a paginnaw, pagdigos ken paglaba, etcetera.

No adda man nagtedted a danum manipud ti faucet idi dayta nasa-o a tiempo kadagiti sumagmamano a paset ti Metro Manila, nagpuyat piman dagiti ordinaryo nga umili tapno agurnongda ti danum.

Nasakit a denggen ngem medyo umarngi a kasta ti scenario a mapaspasaran ti agdama dagiti agrekreklamo nga INWD concessionaires idiay Paoay, Ilocos Norte nanipud pay itay kallabes a tawen 2019.

Sus! Binulbolan ton nga agsagsagaba dagiti appo a taga-Paoay ti masansan a water interruption ken low water pressure iti INWD-Prime Water basar ti TV interview dagiti maseknan ken indanonda payen ti reklamoda ti print media.

Adda daytoy Prime Water a kompania a taga-Manila a business partner iti INWD ngem apay ngata haan da a marisot daytoy a problema ti water supply dita ili iti Paoay?

Ti pagrasrason ni GM Teodoro ket epekto kano daytoy gapu ti regular a preventive maintenance iti planta ken facilities da idiay Paoay Lake nga isu ti pagtataudan ti supply iti danum a para kadagiti INWD concessionaires iti Paoay.

Apay ngarud idi naglablabas a tawtawen, nakapinpintas ti serbisyo iti INWD dita Paoay.

Sapay koma ta ti kabiitan a panawen ket agsubli ti napintas a serbisyo iti INWD dita Paoay tapno kasta maay-ayo ken maragsakan met dagiti concessionaires a natudyo ken adelantado nga agbaybayad ti water bills da kada bulan.#