Naruay a nagannak ken nataengan ti mangkanunong iti panakaipasa itay nabiit idiay Kongreso iti gakat a maisubli ti subject a Good Manners and Right Conduct kas paset ti Education Curriculum para kadagiti agad-adal ti kindergarten aginggat Grade 3 iti pampubliko ken pribado nga eskuelaan ditoy pagiliantayo a Pilipinas.
Ditay koman baliksen, ngem daytoy ti kinapudno: Manmanon kadagiti ubbing, agtutubo ken Millennial ti addaan ti GMRC iti inaldaw-aldaw a panakilangenda iti kagimongan.
Segun ti rekord, maiyad-adal iti agdama a curriculum iti GMRC ngem sangkabassit laeng. No ar-arigen, padamgis laeng iti panakaisuro na kadagiti ubbing iti uneg ti pagadalan.
Naimbag laengen ta adda da Tatang ken Nanang a mangpunpuno ti pagkurkurangan dagiti Mangisursuro ti pagadalan mainaig toy a banag.
Kas resulta haan a naan-anay ti panakaipasagepsep iti pudpudno nga anag ti makunkuna a GMRC wenno Good Manners and Right Conduct.
Ania ngamin ti bugas iti GMRC a rumbeng a maisubli a maiyadal kadagiti ubbing tapno matubayda nga addaan ti nasayaat a kababalin iti uneg ti pagtaengan, pagadalan, kommunidad ken sibubukel a kagimongan?
Basar ti nagtitipon a gakat dagiti siam nga agpanpanday linteg idiay Senado ken House of Representatives a naaprobaran iti 3rd ken final reading idi Nobiembre 4, 2020, kalikagum ti Bill No. 5829 a maiyadal kadagiti school pupils iti kindergarten aginggat Grade 3 ti galad a panangrespeto ti bukodda a bagi, panangrespeto kadagiti padada nga estudiante ken dagiti nataengan, disiplina ken kinaurnos, sincerity, honesty, obedience ken kangrunaanna la unay love for country.
Iti ababa a panna-o, moral ken character-building ti kayat a tumboken ti nasa-o a gakat iti GMRC.
No opisial nga agbalin ton a naan-anay a linteg daytoy a gakat ket seryoso a subject iti curriculum a buyogan iti aktual nga aramid, di bumurong a narayray to manen ti kababalin dagiti ubbing ken agtutubo ken agtultuloy to latta a narimat nga ugali aginggat madanonda ti pangal iti kina-senior citizen.#
