Gakat kontra terorismo

Gakat kontra terorismo

Nabara a pagsasaritaan iti agdama ti Anti-Terrorism Act idiay Senado, Kamara, iti social media, ken sapasap a kagimongan.

Nagbalin a kontrobersyal agsipud ta adu ti mangkontra kadagiti linaonna. Iti bukodda a panirigan, negatibo.

Nu saan a balinsuek, nakodrep. Makaulaw ken mangiyaw-awan.

Gagangay a dagiti nadasar a kontra ket aggapu ti opposision politikal, dagiti militante a grupo, human rights group, simbaan, aktibista, ken akademia.

Dayawentay ida ta ammoda ti agtimek imbes nga agulimek lattan.

Nu adda talugadingmo a masirib, usarem iti husto a wagas kas maiyannatop iti pagayatan ti Namarsua.

Iti sidong ti demokrasya, siwayawaya ti siasinno man nga umili a mangipeksa ti opinionna iti nasa-o nga isyu ti gakat kontra terorismo.

Adu kadagiti kontra sektor iti agbubuteng nu kas pagarigan agbalin daytoy a bill a naan-anay a linteg ti pagilian a Pilipinas.

Iti makadakes dida kayat a bigbigen dagiti safeguards a linaon ti gakat. Nu nangisit, nangisit to lattan ti makitada, period.

Dagiti dadduma dida kabisado ti linaon ti gakat ngem addan opinionda basar laeng kadagiti nasagapda a sayangguseng iti sirkulo a paggargarawanda.

Haan pay a pinal iti amin. Addan ken ni Pangulo Duterte no aprobaranna wenno i-veto na ti bill.

Libre ti siasinno man a pulano a kumamang iti Korte Suprema no addanto panagdudua kadagiti provisions iti Akta, constitutional wenno unconstitutional.#