Pinirmaan ni Presidente Duterte ti Anti-Terrorism Bill idi Biernes July 3 ken agipekto a naan-anay a linteg ti pagiliantayo a Pilipinas inton Hulyo 19, 2020 kalpasan ti pannakaimalditna ti pagiwarnak nasional ken official gazette ti gobierno.
Nabuak dagiti naruay a kakailian, nangnangruna dagiti mamasirib ken oposisyon, abogados ken militantes, critics ken cynics.
Aminda kontraenda ti nasa-o a kabarbaro a paglintegan. Adu a rasones ti inyebkasda kontra kadagiti linaon a probisyon ti madakdakamat nga Anti-Terror law kas koma pannaka-abuso ti human rights, freedom of speech, ken dadduma pay a nakakaalinggaget a banag seknan ti karbengan dagiti pada a Pilipino. Dayta ti bukodda a paniriganda.
Nagtured met a nagprotesta babaen ti rallies dagiti agtutubo nga estudiantes ken ordinaryo nga umili idiay Metro Manila ken sabali pay a paset ti pagilian a nangsupiat ti kontrobersyal a paglintegan.
Ngem kas paset ti demokrasya, libre dagiti oposisyon a dumatag ti Korte Suprema tapno kontestarenda ti constitutionality ti Anti-Terror Law.
Ti biang ti Malacanang, ingunamgunamna a napintas ti gagem ti Anti-Terror law tapno masalakniban ti sekuridad ken linak iti pagliantayo kontra kadagiti grupo ti terrorista a mangisaksaknap ti aligagaw ken buteng, pammatay ken panagdangran, pakairamanan dagiti piman nga inosente nga umili.
Urayen tayo ti desisyon ti Korte Suprema. Mabigbig ti kinatakneng ken kinawayawaya ti liderato dagiti mahistrados. No anianto ti pinal a pangngeddengda, bigbigen koma ti agsinnumbangir a partidos.#
