NAKABUTBUTENG A SAKIT

Coronavirus ti maysa a sakit a mabilang a nakabutbuteng gapu ta alisto a mangkettel ti biag iti maysa tao apaman a kimpet daytoy kenkuana, segun kadagiti eksperto medikal.

Daytoy a coronavirus ti agraira iti agdama idiay China ken kadagiti nadumaduma a pagilian. Ginasut a tatta-o idiay China iti natayen ken rinibu pay kadakuada ti agsagsagaba iti nasa-o a sakit.

Ditoy bukodtay a pagilian a Pilipinas, addan pasyente– maysa Chinese man a naggapu idiay Wuhan, China ti konpirmado a pimmusay idiay Metro Manila gapu ti maipagarup a panagsagabana ti nasa-o a coronavirus, segun ti official report ti Department of Health.

Ditay mababalaw dagiti naruay a kakailiantayo nga agsidduker ti riknada iti daytoy a damag gapu ta ti ballaag a mismo ti DOH ket very dangerous disease ti coronavirus nga alisto a maiyakar iti pada a tao babaen ti close contact, linnangen, ken panagpupolapol.

Nalawag ti rakurak ni Health Secretary Francisco Duque III a haan nga airborne disease ti coronavirus. Haan a maipalpalais iti angin iti mikrobiona.

Kas pagarigan, kinunana, a nu nagba-eng wenno naguyek ti maysa a carrier ti coronavirus ket haanna nga inappot usar koma ti panyo wenno tissue paper ti agongna wenno ngiwatna, mabalin a maiyakar didiay sakit babaen ti maiparsiak a katay wenno buteg nga agdisso iti rupa ti asideg kenkuana a tao kas ti droplets a malang-abna ken maipaunegna ti mikrobio a mapan iti barana nga agtennag a coronavirus acute respiratory disease.

Sapay koma ta maespaltayo ditoy probinsya tayo nga Ilocos Norte ken sibubukel nga Amianan iti daytoy a klase ti sakit.

Rumbeng ngarud nga agnanayon tayo a naan-nad a mangsaluad ti salun-at tayo babaen ti napeklan a panagdaldalus, haan laeng a ti personal hygiene tayo nu diket pay iti aglawlaw.

Suroten tayo a naimbag amin dagiti healthy tips ken warning nga yetnag ti DOH kontra ti coronavirus tapno maiyadayo tayo iti ania man a peggad mainaig iti daytoy a killer disease.#