Kasla awan ti kaes-eskan ti sentimos kalpasan nga awatentayo a supli ti ginatang a groserya wenno ania a banag kadagiti pagtagilakkuan. No pasig a sentimos wenno laokam ti sentimos ti pagpletem iti tricycle, kusilapannaka ti Manong Drayber wenno ibarsakna ti uneg iti kahonna, siniales a laisenna ti pinagpletem a sentimos. Agmulagat ti dakkel ti suplada a tindera no sentimos ti igatangmo iti lakona. Haan a kayat dagiti annak a balonen idiay eskuelaan ti sentimos a paggatangna ti meriendada. Kasla awan ti balor ti sentimos.
Manmano wenno awan pay ketdi ti agibulbulsa ti sentimos ngamin nairuam ti tao a no inyawidna ti supli a kusing, ibatina iti balay ket ditan piman a maipaspasuli laeng. Dagiti dadduma, urnongenda ken ipisokda iti garapon agingga nga agluplupyas ti kaadona.
Amin dagitoy a paliiw, mailukiben iti napalabas. Ngamin, addan napintas a damag manipud ti Bangko Sentral Ng Pilipinas. Segun ken ni BSP Batac City Branch Manager Buenafe Alino, agawatda ti sensilyo a sentimos ket sukatanda dagitoy a sentabos iti kuarta de papel wenno paper bill money maibasar ti dagupna. Addan naituding a counter iti BSP idiay Robinsons Mall dita San Nicolas, Ilocos Norte nga agawat kadagita a sentimos nga ik-ikutanyo tapno masukatanda iti paper bills. Naplanon ti BSP a manglukat ti sabsabali pay a kaaspingna a counters kadagiti dadakkel pasdek negosyo ditoy Laoag City.
Saludaranmi ti BSP ta adda kastoy a gannuatna a pagsayaatan ti sapasap nga umili. Gayam, dagita maipaspasuli a sentimos agraman dagiti sensilyo a lussok iti tengngana ket adda met laeng kaimudenganda no maurnong. Tay kunadan, bassit usit ngem makaparungiit.#
