Published Date: Jan. 30-Feb. 5, 2017
Dua gasut (200) a tawen ton ti panagsina iti Ilocos Norte ken Ilocos Sur inton umay a tawen 2018.
Idi punganay a tiempo dagidi Español a nangsakop ti Pilipinas, maymaysa ti makunkuna nga Ilocos ditoy deppaarna iti Amianan a Luzon. Ngem gapu ti tarigagay dagidi nagkauna a lokal a lideres, pinagsinada ti Ilocos idi tawen 1818.
Kas resulta, nagbalin nga agwaywayas ti dua a probinsya ti Ilocos Norte ken Ilocos Sur nanipud idi 1818 agingga iti agdama. Kas paset ti pakasaritaan, nairaman pay a simmina ti La Union ken Abra a kas agwaywayas met a probinsya manipud ti sidong ti orihinal nga Ilocos.
Ti mautob a rason no apay a naipusingda ti sidong iti orihinal nga Ilocos ket tapno adda naan-anay a wayawaya dagiti lokal a lideres a mangpadur-as ti bukodda a probinsya para ti pagsayaatan dagiti umili.
Ti biang iti agdama a liderato ni Gobernador Imee Marcos, inikkana ti importansya ti panagsina ti Ilocos Norte ken Ilocos Sur idi petsa Pebrero 2, 1818 basar ti historical record. Daytoy ti rason a linagip ti Kapitolyo Probinsial ditoy Laoag City idi Hwebes, Peb. 2 ti maika-199 a founding anniversary iti Ilocos Norte. Ti ababa a panirigan, ti nasao nga annibersaryo ti maibilang a bisperas iti 200 a tawen a selebrasyon iti Ilocos Norte-Ilocos Sur territorial split wenno bicentennial celebration.
Napateg a maammuan ti agdama ken sumarsaruno nga henerasyon ti historya iti lugar nga intay paggargarawan. Ditay kayat a kalangakang iti utek tayo, no historya iti pagsasaritaan.#
