Umabot iti limapulo a bangka ti nakipaset iti fluvial parade ti La Virgen Milagrosa iti ili a Badoc.
Indauluan da Badoc Mayor Maximo Cajigal ken ni Parish priest Rev. Father Frederick Astudillo ken dagitoy ti nangbayabay iti imahen ni La Virgen Milagrosa.
Karaman pay kadagiti naglugan kadagiti Bangka a nakipaset iti nasao a parade ket dagiti 21 a kandidata ti Miss Ilocos Norte 2017.
Naammuan a saan a nakaatendar ti kandidata ti ili a Dingras gapu ta nagtabon ti lolona idinto a ti kandidata ti Miss Currimao ket adda ti projectda iti eskuela a nasken nga ileppasna.
Malaksid kadagiti naglugan ti Bangka, adda pay dagiti naglugan ti balsa a nangsabat iti imahen a nagipatapaw ti kandela ken iti isasanglad ti bangka a nakailuganan ti imahen ket ditoy a nagipuruak dagiti ubbing iti sabsabong.
Segun ken ni Provincial Tourism Officer Mr. Ianree Raquel, umabot iti lima ribu a tattao ti timmabuno iti nasao a naindaklan nga okasion para ken ni La Virgen Milagrosa.
Mainaig iti daytoy, ibilang ti provincial tourism officer ti nasao nga aktibidad a balligi nupay daytoy ti damo a maisayangkat ti fluvial parade iti nadakamat a lugar.
Kalpasan a naibaba ti imahen ni La Virgen Milagrosa ket naisayangkat ti panagkararag iti uneg ti chapel iti panangidaulo ti koro paroko iti ili a Badoc.
Naisaruno met a dagus ti panagsala dagiti “dancers” ti Baro a Badoc.