Manamnama a mairugin iti umay a bulan ti Hunyo ti pannakaipasdek ti Bugnay Bridge iti Barangay San Agustin iti ili ti San Nicolas, Ilocos Norte.
Inpalgak ni Provincial Agrarian Reform Program Officer Vic M. Ines a ti Bugnay Bridge ket paset ti Tulay ng Pangulo para sa Kaunlarang Pang-Agraryo program wenno TPKP.
Inlawlawag ni Ines a ti TPKP ket isu ti pannakaipasdek kadagiti “universal bridges” wenno rangtay kadagiti Agrarian Reform Communities (ARCs) ken lug-lugar a sakop ti Comprehensive Agrarian Reform Program.
Gagem ti TPKP a mapasayaat ken mapa-alisto ti pannakaidalyasat dagiti produkto manipud kadagiti nadumaduma nga ARCs.
Ti Bugnay Bridge wenno ‘Tulay ng Pangulo’ iti San Nicolas ket maipasdek babaen ti panangbibinnadang ti Department of Agrarian Reform, Department of Public Works and Highways ken ti LGU San Nicolas.
Itay laeng kallabes, nakumpleton ti konstruksyon ti Buted Bridge iti Barangay Lataag, Laoag City a paset met laeng ti TPKP project. (Jopo Guerrero/DAR)
