“Panag-abuos”: Rambak idiay Banna

BANNA, Ilocos Norte — Iyarig ni Gob. Imee Marcos a “Mini Tan-ok” iti naisayangkat a “Panag-abuos Festival” iti ili a Banna a sinelebraran ti nasao nga ili idi Abril 10.

Nakipartisiparan daytoy dagiti amin a sangapulo ket pito a barangay iti ili a Banna iti liderato ni Mayor Carly Abadilla.

Dinayaw ti gobernador iti kinalaing dagiti ubbing nga agad-adal iti elementaria ken sekondaria a nagpabuya iti Panag-abuos Festival.

Kuna ti gobernador a makapawayen dagitoy nga ag-perform no adda dagiti mangawis kadakuada nga agpabuya babaen kadagiti dagiti lokal ken gangannaet a turista.

Saan laeng nga iti benneg ti turismo iti dinakamat ti gobernador iti panagsaritana kabayatan ti nasao a selebrasion ngem ti pannakaitandudu pay iti benneg ti pagsapulan.

Daytoy ti rason a ginutigot ni Gob. Marcos dagiti umili nga ad-adda pay a padur-asen dagiti bukodda a produkto kas iti “rice coffee” ken “otap” tapno adda pay nayon a pamastrekan wenno pagtrabahuan dagiti kaprobinsiaan.

Ti panagfiesta iti ili a Banna ket tinawen a maar-aramid ti kada bulan iti Abril a panagadu ti maala a buos kadagiti kayo ti bantay.

Nupay kasta, selebrasion laeng ti naaramid a “Panag-abuos Festival” ita a bulan gapu ta immunan a nagfiesta ti ili a Banna itay napan a bulan ti Disiembre. (PGIN-CMO)