Naplano a kasar da’Romeo & Juliet’ kiniltay ti trahedia

LAOAG CITY (Feb. 7) – Gapu iti trahedia, nakiltay ti naplano a kasar da ‘Romeo ken Juliet’ inton koma Pebrero 14, Valentine’s Day.

Ni Kristian dela Cruz, 34, ti maipagarup a nagbekkel, usar na ti maysa a nylon cord babaen ti panangisilona iti tengngedna sana inbitin iti maysa a dakkel a sanga ti mangga.

Basar ti eksaminasyun nga inwayat ti Laoag City Health Office (CHO) iti bangkay, napaneknekan a ti biktima ket natay gapu iti asphyxia secondary to hanging.

Maladingitan ti live-in partner ni Dela Cruz a ni Myra Foronda gapu ta nakaplano ti dua nga agkasarda koma inton Pebrero 14 Aldaw ti Puso.
Kinuna ti polisia a dida pay ammo ti motibo iti nasa-o a suicide case.