Pinasingkedan dagiti nakipartisipar iti Paoay Lake International Regatta 2015 a napinget ti kalikagum da nga agsubli ditoy probinsya iti kanito nga adda manen ti maisayangkat a rowing competition ditoy Ilocos Norte.
Para kadagiti nakipartisipar, awan ti kaasping ti Paoay Lake kadagiti lugar a nagturturungan dan a nakaisaysayangkatan ti maiyasping a kompetisyon.
Kangrunaan nga ehemplo dagitoy ti dinakamat ni Gobernador Imee Marcos itay kallabes a kinaasideg ken kinapintas ti dalan nga agturong iti nasao a lugar manipud iti Laoag International Airport.
Kabayatan na, inpakaammo ni Faivo Bartolome ti Ilocos Norte Sports Development Council a dagiti nangabakan ti Malaysia iti kalkalpas a rowing kompetisyon ket ti Lightweight Men’s Single, Lightweight Men’s Pair, ti Lightweight Men’s Four ken ti Lightweight Women’s Pair.
Imbatad na a dagiti nangabakan ti Pilipinas ket ti Lightweight Women’s Single, Lightweight Women’s Double, Lightweight Women’s Four, Junior Men’s Single, Lightweight Men’s Single Novice, Lightweight Men’s Double Novice, Lightweight Men’s Four Novice ken ti Lightweight Men’s Double Masters a nangabakan ti Pilipinas ken ti United Kingdom.
Maipalagip a walo amin dagiti team a nakipartisipar a pakairamanan ti dua a team manipud Malaysia, ti Philippine Team ken ti Ateneo School. (PGIN-CMO)
