MANANG IMEE NAGYAMAN ITI CHINA

 

Napalaus ti panagyaman ni Gobernador Imee Marcos iti gobierno ti China iti agtultuloy a panangipapaayna ti tulong iti Ilocos Norte.

Inbunannag daytoy ti gobernador iti pannakaibunongen ti Chinese Hybrid Rice nga indonar ti nadakamat a pagilian para kadagiti mannalon a nakana a naapektaran iti isasaplit ti bagyo Lawin.

Rinaem ti gobernador ti kinasayaat ti China a karruba a pagilian nga uray saan nga agkidkiddaw ti tulong ti pagilian ket ididiaya na ti tulong na iti pannakakitada iti rigat a nagpasaran ti probinsia iti nasao a bagyo.

Kangrunaan a nagyamanan ni Gobernador Imee ni Consul Li Yuecheng ti Peoples Republic of China Consulate ditoy Ilocos Norte gapu iti dakkel nga akem na iti alisto a pannakaipaay ti sangapulo a tonelada a “hybrid rice”.

Maipalagip a sangapulo a tonelada ti “hybrid rice” ti indonar manen ti China ita a tawen kalpasan a nangipaay ti lima a tonelada itay napalabas a tawen.

Mangnamnama ti gobernador a no kasano ti kinapintas ti naapit dagiti mannalon iti immuna a hybrid a donasion ti China ket napinpintas to manen ti maapit da manipud iti naud-udi a naawat ti probinsia a donasion. (PGIN – CMO)