Kadiwa ni Manang Imee tumulong kadagiti mannalon

Mangrugi inton bigat, tumulong ti Kadiwa ni Manang Imee kadagiti mannalon ditoy probinsia babaen ti panaggatang ken panagilako kadagiti mulada a nateng.

Segun ken ni Jill Quitoriano iti INVEST, kompraen ti gobierno probinsial dagiti apit dagiti mannalon tapno dagitoy ti agilako babaen iti Kadiwa ni Manang Imee. Karaman kadagiti produkto a mailako ket dagiti nateng, bawang kasta met kadagiti kangrunaan a kasapulan dagiti umili iti inaldaw kas iti bagas ken dadduma pay.

Agplastar ti Kadiwa ni Manang Imee iti Dap-ayan Center manipud iti alas 4:00 iti malem agpatengga iti alas 8:00 iti rabii.
Gapu iti daytoy, inawis ni Manang Imee dagiti kailian nga umay gumatang iti Kadiwa Center iti Dap-ayan gapu ta nalaklaka dagiti mailako no idasig iti presio dagiti magatang iti groseria ken tiendaan.

Gagem ti kaudian a ganuat ni Manang Imee ket tapno naan-anay a matulongan dagiti mannalon a nakaro a naapektaran ti apitda itay kallabes a Bagyo Ineng.

Iti umay a lawas, agbalin ton a dua nga aldaw ti Farmers Market. (PGIN-CMO)