Iskolar ni Manang Imee, 13 amin dagiti Addaan iti Honors

Saan a mailadawan ti ragsak dagiti ubbing kangrunaanna dagiti nagannak dagiti Iskolar ni Manang Imee a Magna Cum Laude ken Cum Laude kabayatan nga inawagan ni Gob. Imee Marcos iti nagan da iti pannakaibunong ti stipend dagiti 250 nga iskolar ti probinsia itay napan a Marso 26 aldaw ti biernes.

Uray ti gobernador ket makita iti ragsak ti rupana iti panagballaigi dagitoy nga ubbing nga agturpos ti kolehio nga addaan iti honors.

Sangapulo ket tallo dagiti nagasat nga ubbing nga Iskolar ni Manang Imee nga agturpos iti kolehio ita a tawen, maysa ti magna cum laude ken 12 dagiti cum laude manipud iti MMSU ken Divine.

Kinablaawan ti gobernador dagitoy pakairamanan dagiti nagannak kadakuada gapu ta inlalaingda ti nagbasa nga itan ket nagbalaigida gapu ta makalpasdan nga agbasa.

Mamati ti gobernador nga iti pannakapagturposen dagitoy, daytoy metten ti mangitunda kadakuada iti manamnama nga ilulung-aw ti kasasaad ti panagbiag ti pamiliada manipud iti kinakurapay.

Ni Allan Dave Patubo a taga Brgy. 12, Laoag City ken agad-adal iti MMSU-College of Industrial Technology ti nagasat a a Magna Cum Laude iti daytoy a tawen.

Kunana a saan a tubeng ti kinakurapay tapno maragpat iti ballaigi nangruna ket adda iti Iskolar ni Manang Imee a nangtulong kenkuana iti panagbasana.

Dakkel unay iti panagyamanna ken ni Gob. Imee Marcos gapu ta no awan ti naipaay kenkuana nga scholarship ket mabalin a saanna a nagun-od iti panagballaigina.

Daytoy met ti nagbalin a karit kenkuana a nangigaed ti panagbasana agingga nga agturposen iti kolehio.

Maysa pay kadagiti nagasat nga agturpos a Cum Laude ket ni Julian Marie Lorenz Alipio a taga Brgy. 1 Laoag City nga agad-adal iti MMSU nga addaan iti kurso a BS in Accountancy. (PGIN-CMO)