Isasanglad ti Star Cruises’ Superstar Virgo, mangpadur-as ti turismo iti Ilokandia – DOT

SAN FERNANDO CITY, La Union, Marso 30 (PIA) – – Dakkel a tulong para iti ad-adda pay a panagdur-as ti turismo iti Ilokandia ti simmanglad a Star Cruises’ Superstar Virgo iti Port of Currimao iti Ilocos Norte idi Marso 20, 2017, segun ti opisina ti Department of Tourism (DOT) ditoy.

Kinuna ni Modesto Baloloy, agdama a hepe ti tourism operations office ti DOT ti Rehion 1, a naragsak a pinasangbay ti ahensiada ken ti gobierno ti Ilocos Norte dagiti nasurok a dua rinibu a turista a linaon ti barko.

Kalpasanna, pinasiar dagiti turista ti Bangui windmills, ti Burgos lighthouse, ti Kapurpurawan rock formation ken ti white beach iti ili a Pagudpud.

Maysa kadagiti kadakkelan a barko iti intero a lubong ti “Superstar Virgo” gapu ta addaan 13 a kadsaaran ken 935 cabins a makalaon ti agdagup 4,000 a tattao karaman ti turista ken trabahador.

Addaan pay ti barko kadagiti nagduduma a pasilidad a kas iti swimming pool, 100-meter water slide, bar, gym, salon ken spa, duty free shops ken karaoke room a mabalin a pagliwliwaan dagiti turista iti uneg.

Kalpasan ti Marso 20, sumanglad ti Superstar Virgo iti Port of Currimao maminsan kada lima nga aldaw aginga iti bulan ti Mayo. Ti ruta ti barko ket Manila-Laoag-Kaohsiung-Hongkong ken Manila.

Manamnama nga iti bulan ti Disiembre, agbalinton a regular ti panagsanglad ti barko iti Port of Currimao ken mabalinto payen ti aglugan wenno agrubuat iti nasao a port dagiti Ilocano a mayat a mapan pumasiar kadagiti pagilian a papananna. (Freddie G. Lazaro,PIA 1)