Impannakkel ni Gobernador Imee Marcos ti kaadu dagiti mabalin a maipagtangsit produkto iti Ilocos Norte.
Segun kenkuana, malaksid kadagiti agkakapintas a buya a masarakan ditoy probinsia ket adu pay dagiti mabalin a maidiaya a produkto.
Maibilang ditoy ti kaiyam-ammo idiay Victorinos Restaurant, Quezon City a produkto nga Imeldifique cooking wine ken ti dragonfire wenno ti wine manipud iti dragon fruit.
Inlawlawagna a babaen iti panagusar ti Imeldific cooking wine ket uray dagiti saan na unay nga ammo ti agluto ket agbalin a naimas ti luto da.
Kunana a ti Imeldific wine ket addaan ti naidumduma a raman gapu ta daytoy ket napagtitipon a mabigbig a produkto dagiti Ilocano kangrunaan na iti Ilocos Norte kas iti bawang, lasona, dragon fruit ken dadduma pay.
Mamati ti gobernador a babaen iti panangpadas iti baro manen a produkto ti Ilocandia ket manamnama nga agbalin a nalatak a kas kadagiti immun-una a produkto ti probinsia. (PGIN-CMO)
