Kalikaguman ni Gob. Imee Marcos a maurnos a naimbag dagiti pampubliko a luglugan ditoy Ilocos Norte.
Daytoy ti kangrunaan a rason a kinataripnong ti gobernador dagiti nadumaduma a grupo dagiti transportasyon nga adda iti babaen ti Metro Ilocos Norte Council.
Inlawlawag ni Gobernador Imee a napagnunumoan nga adda ti maisayangkat a training para iti pannakaiwanwan a naimbag ti federasyon dagiti van rentals, jeepneys ken tricycles.
Imbatad na a maiyun-una ti pannakabukel ti federasyon ti grupo dagiti transportasyon iti syudad ti Laoag.
Mamati ti gobernador a babaen iti daytoy ket maalay-ayan ti problema iti sobra a kinaadu dagiti luglugan.
Kunana a no maurnosen dagiti luglugan ditoy syudad ti Laoag ket al-aliston a masolusyonan ti problema kadagiti luglugan iti sabsabali a paset ti probinsya.
Innayon ni Gobernador Marcos a no organisado dagiti luglugan ket maaddaan da ti federasyon ditoy probinsya ket ad-adda pay a mapapigsa dagitoy. (PGIN-CMO)
