Eskarlatina nga agbalor P6.2M ti nailakon ni GM Teodoro

LAOAG CITY, Hunio 8 (PIA) – Ti kinangayed ti napusaksak a “bougainvillea” a kadawyan nga agsabong ti nalabaga (adda pay maris puraw, pink ken violet) ti nakaawisan ti imatang ni Engr. John Teodoro nga agpatanor ti adu a patubo a maimula a kas masetas iti arubayan.

Pinagbalin pay ni Teodoro, general manager ti Ilocos Norte Water District, a negosio ti panagpaaduna ti “eskarlatina” (Ilokano ti bougainvillea) gapu ta adu ti mayat a gumatang.

Segun kenkuana, umaboten ti P6.2 million ti naglakuanna ti “bougainvillea” sipud pay inrugina ti nagpatanor idi 2005.

Iti agdama, aganay 60,000 ti patubona a “bougainvillea” a nakasalansan iti lotena nga aglawa iti maysa ket gudua nga ektarya a masarakan idiay Barangay Juan, Solsona, Ilocos Norte. Mailaklako ti tunggal patubo iti P75.

Kabayatanna, ti “bougainvillea” ti maibilang a kangrunaan a masetas ita iti Ilocos Norte gapu ta daytoy ti ipam-pamula ti lokal a gobierno kadagiti agsumbangir nga igid ti kalsada iti intero a probinsia.

Malaksid iti dayta, ti “bougainvillea” pay ti maar-aramat a masetas ken dekorasyon kadagiti dadakkel a hotel iti Ilocos Norte a kas iti Fort Ilocandia ken Plaza del Norte.
Kinuna ni Teodoro a nasayaat ti eskarlatina a maimula iti igid ti kalsada gapu ta natured iti pudot ken napintas dagiti sabongna.

Kinunana pay nga al-alisto ti panagpaadu ti bougainvillea babaen iti panagparusing kadagiti naputed a sangana. (MCA/FGL,PIA-1 Ilocos Norte, Ella Kristine Ganal, intern DevCom MMSU)