PIDDIG, Ilocos Norte, June 1 (PIA) – Ti kadagupan dagiti kasla agtubo nga uong a plantasyon ti “dragon fruit” iti Ilocos Norte, maibilang a naidumduma ti maysa kadakuada a masarakan idiay Barangay Maruaya ditoy nga ili.
Daytoy ti “Dragon Fruit Farm,” maysa a modelo a bangkag ti “dragon fruit” a na-convert a resort a kukua ni Esmundo Montañez, dati a manursuro iti Manila a nayasawa ti taga-Piddig.
Iti pito ektaria a kalawa ti “farm,” agdagup ti sangapulo a ribo (10,000) a poste ti naipatakder a pagkalatkatan dagiti “dragon cactus” a naipalawlaw iti naaramid a paglalangoyan (swimming pool) ken kalkalapaw (cottages).
Malaksid iti “dragon fruit,” adda pay naimula a pinuon ti ubas (grapes) ken strawberry; ken naduma-duma a klase ti natnateng a kas iti letsugas, kamatis, sili, rabanos, petsay ken dadduma pay.
Adda pay naaramid a “fish pond” a mabalin a pagbanniitan dagiti bisita ngem adda naituding a bayad dagiti ikan a maala.
Segun kenni Manong Esmundo, inaramidna ti resort tapno itandudona ti kinapateg ti bangkag wenno kataltalonan a kas maysa nga atraksyon kadagiti tattao a naayat ti mula.
Inrugina ti nagmula ti dragon fruit iti nasao a lugar idi 2008, agingga a napanunotna a nayunan ti dadduma a klase ti mula tapno ad-adda a pumintas.
Mapadakkel amin a mula iti resort babaen iti “organiko” a wagas tapno masaluadan ti aglawlaw. Awan ti mausar a kemikal a pestisidio ken abuno iti panangpadakkel kadagiti mula.
“Organiko a ganagan manipud iti takki ti alinta wenno daytay aw-awaganda a vermicast ti us-usarek a mangpadakkel kadagiti amin a mula ditoy farm,” inlawlawagna.
Ita, daytoyen ti maysa kadagiti nalatak a lugar ti probinsya a pas-pasyaren dagiti bakasyonista ken umili. Madanon ti resort iti las-ud ti uppat a pulo (40) a minuto a panagbyahe nga appadaya manipud iti Siudad ti Laoag.
Nadesinio pay ti Dragon Fruit Farm & Resort a pagpiknikan ken adda dagiti naaramid a siled a maupaan a pagturogan dagiti sumangbay a tattao. (Freddie G . Lazaro/PIA-1 Ilocos Norte/Eden Gay Malana,intern MMSU)
