Inpanamnama ni Bise Gobernador Angelo Marcos Barba iti Ilocos Norte nga agtultuloy ti panangidanon ti gobierno probinsial kadagiti serbisio iti nadumaduma nga ili ken siudad ditoy probinsia babaen iti Manang Imee’s Capitol Express.
Inbunannag daytoy ti bise gobernador iti pannakaisayangkat ti CapEx iti ili a Sarrat kalpasan a daytoy ti nangidaulo iti grupo a nagturong iti nadakamat nga ili.
Segun kenkuana, ikarigatanda ken ni Manang Imee ti kaadda ti mailatang a pundo para iti nasao a programa.
Impasigurado na nga agingga a daytoy ti bise gobernador ken ni Gobernador Imee ti gobernador ti probinsia ket saan nga agsarday ti pannakaidanon ti serbisio kadagiti umili ditoy probinsia.
Kangrunaan a naidanon a serbisio ti medical ken dental pakairamanan ti libre nga agas, pannakaipaay ti 400 a kilos a bin-i a bawang iti uppat nga asosasion dagiti mannalon, bin-i a bukbukel ti natnateng ken foliar, 15 ribu a tilapia fingerlings a naited iti 20 a benepisiario ken 30 nga anteohos a para kadagiti senior citizens, ken napag-birthday pay dagiti senior citizens nga agkasangay ita a bulan ti Septiembre.
Malaksid iti daytoy, adda pay dagiti pannakabagi ti Public Employment Service Office wenno PESO nga agawat iti aplikasion dagiti agbirbiruk iti trabaho.(PGIN – CMO)
