Nasapa pay a paset ti bigat ket adun dagiti umili iti kapitolio probinsial.
Kastoy ti kinaregget dagiti naruay a professionals a nanggundaway iti kaadda ti mobile team ti Professional Regulations Commission (PRC) ditoy Ilocos Norte ita a Domingo, Julio 20, 2014.
Dagiti policemen, mangisursuro, inhinyero, agriculturist ken dadduma pay a professionals ket padapada a nagturong iti auditorium iti kapitolio probinsial para iti nasa-o nga aktibidad.
Uray dagiti agkalikagum nga ageksamen iti maangay a Licensure Examination for Teachers iti masungad a bulan ket ginundawayanda met ti kaadda ti PRC ditoy probinsia tapno agaplikar iti nasa-o nga eksaminasion.
Gapu iti daytoy, naragsakan ni Gob. Imee R. Marcos iti naimatanganna a kaaddu dagiti professionals a nanggundaway iti serbisio nga ipapaay ti mobile team ti PRC kalpasan nga isuna a mismo ti nagturong iti auditorium tapno bisitaenna ti panagannayas ti programa.
Dagiti serbisio nga ipapaay ti PRC ket aplikasion ken pannakaipabaro iti lisensia, aplikasion para iti eksamen nga ipapaay ti ahensia, panag-issue iti sertipikasion para good moral standing para kadagiti sumrek iti pagsapulan.—PGIN-CMO
