CURRIMAO, Ilocos Norte, Hunio 9 (PIA) – Manamnama ti pannakaipatakder ti 20 megawatt (MW) solar energy farm project ditoy nga ili iti kabiitan a panawen kalpasan nga inaprobaran ti DENR ken LGU-Currimao ti pannakapukan dagiti kayo iti masakupan ti proyekto.
Agarup 600 a pinuon ti agoho, ipil-ipil ken damortis ti manamnama a mapukan a masarakan iti agarup 50 ektaria ti kalawana a lote idiay Barangays Bimmanga ken Paguludan-Salindeg iti ili ti Currimao.
Kinuna ni PENRO Juan de los Reyes Jr. ti Ilocos Norte, a madaman ti pannakaiproseso ti umiso a permit para ti pannakapukan dagiti kayo a madalapus ti proyekto.
Inkari ti mangimaton ti solar farm, a Soleq Philippines, Inc., a sukatanda ti tallo gasut a napatubon a kayo ti tunggal maysa a kayo a mapukan ken maimula dagitoy iti bakante a lote iti Currimao.
Inkari pay ti Soleq Philippines ti pannakaited ti pundo a Php30 million para iti pannakaipaktader kadagiti pasdek – eskwelaan ken scholarship program para kadagiti lumugar nga estudiantes. Addanto pay mabangon a pagpatuboan ti bunobon a kayo nga agbalor ti Php20 million.
Segun ti Soleq Philippines, kabailan ti 20MW Currimao Solar Farm ti agpataud ti koriente para iti 8,000 a residentes iti inaldaw. (Freddie G. Lazaro/PIA-1 Ilocos Norte, Gilliane Micha R. Niño, intern MMSU DevCom)
