Sirmata ni Gob. Imee Marcos a maaddaan dagiti mannalon iti Ilocos Norte iti sumarsaruno a henerasion iti “off farm income” wenno pamastrekan a saan a direkta nga aggapu kadagiti produkto iti kataltalonan.
Inbunannag ti gobernador a paset daytoy ti napinget a tarigagayna a nadurdur-as ti panagbiag ti sumarsaruno a henerasion dagiti mannalon nga ilocano.
Segun kenkuana, agbalin laeng a nakakaasi dagiti mannalon no agtultuloy a nakasadag dagitoy kadagiti produkto iti kataltalonan nangnangruna kadagitoy a gundaway a saan a maaw-awatan ti panawen.
Inlawlawagna a maysa daytoy a rason a nagatang dagiti Sirib Bus a mausar para iti agro-tourism program.
Imbatadna a dagiti nasao a bus ti pagluganan dagiti turista a mapan kadagiti nasusulinek a lugar iti Ilocos Norte nangnangruna kadagiti agkalikagum a makapadas ti panagbiag iti away.
Segun kenkuana, maibilang ditoy ti panagturong dagiti turista kadagiti dragon fruit farm ken mango farm.
Malaksid iti daytoy, kuna ti gobernador nga adda pay dagiti turista a kalikagumda ti mangpadas nga agraep tapno mariknada ti kas iti nadakamat iti kanta a “Magtanim ay di biro”.
