Date published: January 23-29, 2017 issue
Adda plano ti Sangguniang Panglunsod iti Batac City, Ilocos Norte a mangputar ti maysa nga ordinansa a mangipawil a maminpinsan ti agpautang ti kuarta kadagiti tattao babaen ti makunkuna a 5-6 wenno duapulo a porsiento ti “anakna” wenno “interestna”.
Nadagsen daytoy iti bulsa dagiti umutang a kakailiantayo a kaaduanna kadakuada ket taga-tiendaan ken ordinaryo a komersiante.
Malagip nga idi tiempo daydi Batac Mayor Jesus Nalupta Sr., napinget ti kampaniana kontra 5-6 babaen ti panangimontar na ti dakkel a pakdaar-ballaag ti uneg iti tiendaanda a pampubliko dita Batac.
Iti agdama nga administrasyon ni Batac City Mayor Albert Chua, tarigagay ti SP-Batac a patebkeren ti kampania kontra 5-6 kas maiyannatup ti polisiya ni Presidente Rodrigo Duterte.
Kanunongan ni Mayor Chua daytoy a plano iti SP ngem natanang iti takder na itoy a banag ngamin kayat na a maadal a nalaing tapno masigurado nga awan ti masalungasing nga agdama a linteg, no adda man, mainaig kadaytoy a plano iti SP.
Ammo ti kaaduan, a dagiti gangganaet a Bombay a taga-India ti nalatak nga agpapautang ti 5-6. Maibilang nga illegal gaputa awanan da ti business permit ken haan da nga agbaybayad ti buis ditoy gobierno iti Pilipinas.
Nalabit haan laeng a ditoy Pilipinas ti adda 5-6 na. Uray sadino a pagilian ket adda kastoy a kita ti panagpautang a makunkuna a “loan shark”. Kas pampaneknek, nabayagen nga adda ti balikas a “loan shark” iti daan nga American Dictionary ken kasta pay iti Internet.
Numan pay kasta, mapaksiat koman daytoy nga aramid tapno agpannuray laeng ti legal a sistema ti panagpautang a palubosan ti gobierno.#
