Taldiap iti 2016

editoryal

Date Published: December 26, 2016 – January 1, 2017

Ukagen tay dagiti pasamak ditoy Ilocos Norte iti tawen 2016. Napintas man wenno naliday, sumiplot latta ida iti panunot tayo. Sakbay dayta, kunaen mi nga adu a grasia ken napintas a gasat ti inted ni Apo Dios iti biang toy pagiwarnak tayo nga Ilocos Sentinel. Di mabubos ti panagyaman mi iti Apo a Namarsua ket idawdawat mi ta agnanayon koma a kasta.

Iti biang ti probinsyatayo, adu met a panagdur-as ken nam-ay ti naipaay kadagiti pada nga umili babaen ti liderato dagiti opisiales iti gobierno. Rumbeng laeng, ngamin kinawesantay dagiti opisiales nga agserbi ket suelduan tay ida  babaen kadagiti buis nga intay ibaybayad iti gobierno.

Iti tawen 2016, nagsagaba ti probinsya iti nagsasaruno a bagyo, layus ken tudtudo. Sakbay dayta, immay ti nakaro a tikag gubbuay iti El Nino phenomenon. Dagiti appo a mannalon ti kangrunaan a nadidigraan. Abusta nailumlom da iti utang, awan metten ti namnamaenda a panglakagan a kas koma dagiti apit iti pagtatalonan. Kasta pay a riniwriwriw a pisos ti gated na a sansanikua ken proyektos inprastraktura iti gobierno ti nadadael.  Awan sabali a tudduenda a kulprito no di dagiti simmangbay a nakaro a kalamidad  a maibilang a bales iti nagasawgasaw a nakaparsuan ditoy Ina a Daga.

Ti basing kawel iti politika itay napalabas nga eleksyon idi Mayo 2016, gagangay a nagsina latta ti kampo da Gobernadora Imee Marcos ken Diputado Rudy Fariñas. Nabotosan a kabarbaro a bokal ti anak ni Manang Imee a ni Matthew Joseph Marcos Manotoc. Nailayon met a bokala ti balasang ni apo Rudy a ni Ria Christina Fariñas. Unopposed met dagiti agkaingungot a da Mayora Chevylle ken Bise Mayor Michael Fariñas iti Laoag City. Adu met ti kabarbaro a politiko a nabotosan a mamayores ken bise mayores.

Ditoy Laoag, dakkel a damag ti nangbuak kadagiti taga-syudad itay arinunos iti Hunio 2016 seknan ti pagkabanan ti gobierno iti syudad. Mapattapatta nga agarup P90 milyones a pirak a pondo ti maipagarup a nakumbibaw  manipud ti kaha iti gobierno. Agingga ita, burburtia no kasano a nagpukaw ti nasao a dakkel a kantidad iti pirak. Nagpuga met ngaminen ni apo a tesorera a maipagarup nga addan idiay ballasiw ti taaw.

Seknan ti kriminalidad ditoy Ilocos Norte, rinib-ribu a maatap nga illegal drug pushers ken drug users ti naarestar wenno simmuko kadagiti kapolisan kas paset ti kampania kontra droga iti Duterte administration.

Ditoy ti pungto iti taldiap tayo iti 2016 gapu’t kinakurang ti espasio. Sirmata: Sapay koma ta narayrayray, nadurdur-as ken nagasgasat ti probinsyatayo nga Ilocos Norte toy baro a tawen 2017.#