Published date: February 6-12, 2017
Nasdaaw ni Gob. Imee Marcos ti naipadamag ken kuana a naiyalud-od ti dua a bulan ti panagserbi ni Madam Arceli Pastor a kas schools division superintendent iti Ilocos Norte. Nagpakada isuna kenni Gobernadora itay kallabes nga Enero gapu ta nagretiron iti edad na nga 65 ngem naklaat ti kaadduan ta nagsubli met laeng iti takem na.
Kas natibker a pampaneknek, ni Ms. Pastor ti maysa kadagiti taga-DepEd a nabara a nangsarabu kenni Education Secretary Leonor Briones ken ti bunggoyna a dimteng ditoy Ilocos Norte idi Mierkoles, Pebrero 8. Kayat na a sawen a lehitimo ti panakayalud-od ti serbisyona ta isu met ti nagakem a parupa ti DepEd-Ilocos Norte.
Numan pay kasta, kayat ti Gob. Marcos nga adda koman madutokan a permanente nga opisial a mangsukat kenni Ms. Pastor ngem masapul a masurot ti ranking system. Kayatna a sawen, no asinno ti No. 1 iti ranking, isu ti rumbeng a madutokan tapno maliklikan ti intriga ken dakes nga apal.
Sapay koma ta ti mapilinto a kabarbaro a DepEd schools division superintendent iti Ilocos Norte ket addaan ti talugading a kas ti sumaganad: nasaririt, naanos, nagaget, mannakigayyem, sinsero, strikto ken disciplinarian no kasapulan ken kangrunaanna la unay addaan ti nangato nga integridad ken dignidad.
Awan met ketdi ti perpekto a tao, ngem no adda kenkuana (nominee for the position) ti walopulo a porsiento (80%) iti nasao a talugading nangnangruna ti galad a maka-Dios, mabalin a pasado iti pagrukodan.#
