(ILUKO VERSION) Ilalaentayo no ti masirib nga ubing ket paggugustona ti kurso a science ngem nakurang ti gundawayna nga agtayaktak iti dayta a benneg ti pagsiriban.
Kunatayo, sayang daytoy nalaing nga ubing a maysanto koma met a Thomas Edison wenno mamasirib iti masakbayan.
Iti ababa a panna-o, inbentor, sayantipiko wenno intelihente.
Ipalubos ni Apo Dios, awanton dayta a balikas a sayang, haanton laengen nga arapaap dayta a sirmata agsipud ta addanton manamnama a bukodtayo a Science High School a maipasdek ditoy Laoag City.
Naplansan iti plano. Implementasyon ti sumaruno kalpasan a pinirmaan ni Presidente Duterte ti gakat iti Kongreso a nangbuangay ti nasa-o a Science High School.
Nasurok a P100 milyon ti pagpakauna a pondo para iti nasa-o nga SHS project a maipatakderto dita Brgy. Vira, Laoag City nga addaan ti kalawa a maysa nga ektarya a lote, segun kenni City School Superintendent Dr. Joel Lopez iti DepEd-Laoag.
Haan koman a pagkukumpiangan no naipanagan ti nasa-o nga SHS iti nagan daydi pimmusay a junior ni Diputado Rudy Fariñas. Ngamin, nag-SK federated president ditoy Ilocos Norte daydi junior-na. Nalabit, binigbig ti Kongreso ti gapuanan daydi youth leader, ket babaen iti nasa-o a proyekto, agserbi daytoy a bato-lagip para kadagiti agtutubo.
Ngarud, iwaksi ti intriga. Ti nasken, addanton Science High School ditoy arubayantayo imbes nga agadal dagiti ubbingtayo iti adayo a lugar a kas idiay San Ildefonso, Ilocos Sur, Metro Manila ken dadduma pay nga agdama nga ayan ti Science High Schools ditoy pagilian. #
