Narisgo kadagiti motorista ti agdalliasat kadagiti adu a paset iti highways ditoy Ilocos kadagitoy a tiempo gapu ti narway a proyektos iti Department of Public Works and Highways (DPWH) kas koma ti road widening ken rehabilitasion iti rangrangtay.
Agreklamo dagiti motorista a biahero iti rabii agsipud ta nakurang ti ballaag a mangipakdaar ti peggad iti masungad a paset ti nabakbak a kalsada ken rangtay. No adda man, saan met a “reflectorized” wenno agandap. Delikado kadagiti drivers nga agdadamo nga agturong ditoy luglugartayo ta dita kabisado ti dalan.
Saan koma a kinaliway iti kontraktor ken ahensia iti gobierno ti makagapu ti ania man a disgrasia. Kaaduanna, pinnabasol ti kinaliway no kasta nga adda mapasamak nga aksidente iti highways.
Napintas dagitoy a proyektos iti gobierno ta pagsayaatan ti sapasap. No nasimpa ti kalkalsada ken rangrangtay, naannayas met ti panagbiahe dagiti luglugan. No nanam-ay ti biahe, natalged ken alisto ti idadateng iti papanan a destinasion.
Dagitoy a proyektos ti pakaus-usaran dagiti buis tayo nga umili a kinolekta ti gobierno kadatayo nga addaan ti negosio, sanikua a dagdaga, panggedan ken dadduma pay a pamastrekan.#
