Naindaklan a karit ti naipaima a takem nga akmen ti PDEA (Philippine Drug Enforcement Agency) kontra ti panakapugipog ti parikut iti illegal a droga ditoy bukodtayo a pagilian. Inpusingngen ni Presidente Duterte dagiti polis a mangidaulo ti kampanya kontra droga.
PDEA itan ti lead agency iti gobierno a mangparmek ti kadagiti drug lords, drug pushers ken drug users. PDEA itan ti agipakat iti search warrant nga iyetnag iti Korte.
Iti bukodtayo a panirigan, natangtanang ti garaw iti PDEA kumpara iti kapolisan. Batido ti PDEA no diplomasya ti pagsasaritaan. Ti nasken, natangken ti sangina. Ti biang iti kapolisan, sabali ti nakasanayanda. Nairuamda a makirinnamas iti kanito adda masimisimda a paltiing iti peggad bayat iti operasyon kontra kriminalidad. Narruamda ti Combat.
Numan pay kasta, haan a naminpinsan a napalisi dagiti polis iti kampanya kontra droga. Segun kenni Presidente Duterte, tumulong ti PNP personnel ti likodan iti PDEA iti benneg ti intelligence, monitoring ken surveillance.
Dakkel ngarud ti namnama iti kaaduan a haanton a nakaro a nadara ken makaalingaget ti gubat kontra droga itan ta PDEA ti napusgan a mangparmek ti illegal drugs a kanser iti kagimongan.#
