(Iluko version) Kalpasan ti dua a tawen a tinarawidwidan ni officer in charge Dr. Prima Fe Franco iti Mariano Marcos State University a masarakan ti main campus na dita Batac City, Ilocos Norte, addan napili a karbarbaro a pangulo iti nasa-o nga unibersidad, isun ni Dr. Shirley Agrupis, dati a MMSU biology professor, nalatak a scholar, researcher ken USAID Fullbright scholarship grantee.
Innem ti nagkalikagum iti nasa-o a posisyon ngem ni Dr. Agrupis ti nakagun-od ti mayorya a pito (7) a botos iti dagup a sangapulo ken maysa (11) a bilang dagiti kameng ti Selection Committee a tinatarabay iti Commission On Higher Education (CHED), segun ti tri-media report ita a lawas.
Haan a maliklikan nga intangraraw manen ti intriga iti nalaad a rupana. Kas gagangay dagiti kritiko ti agparnuay ti intriga, ngamin nasariwawek ti utekda.
Kalpasan a napili ni Dr. Agrupis, timpuar ti sayanggusing a sinerrek kano ti inpluwensya iti politika ti nasa-o a panakapili ni Dr. Agrupis.
Haan a pudno dayta nga aligasyon, kuna met nga inpasingked ni MMSU alumni association president ken kameng ti Board of Regents Bismark Quidang. Insulto met ngamin dayta nga aligasyon iti biang dagiti kameng iti Selection Body gaputa mabigbig ken maraem iti nagan ken kinatao-da.
Ti nasken ita ket ti panawagan a panagkaykaysa, kaadda ti urnos ken timpuyog. Agkikibin koma ti tunggal maysa a mangsuporta ti liderato ni Dr. Agrupis tapno magun-od ti arapaap nga ad-adda pay a mapasantak ti kalidad iti edukasyon dita MMSU. #
Photo credits: hoppler.com.ph
