Panagbain wenno panagamak

Seryoso ti Turay Duterte ti kampaniana kontra maiparit a droga ken kriminalidad ditoy pagiliantayo a Pilipinas. Nadamsak ti banagen ti siasinno man nga agin-mamaingel a makirinnupak kadagiti napusgan a polisia ken dadduma nga ahente iti gobierno. Awan ti mayat ti nadara nga implementasyon iti daytoy limmandok a polisiya iti Turay Duterte.

Sakbay ken kalpasan a nagsapata ni Apo Digong a kas pangulo, narwayen a masuspetsaan nga illegal drug pushers ken drug users ti bulontaryon a simmuko iti turay. Kaaduanna ragup dagiti simmuko ket nagkarida nga isardengdan a maminpinsan ti dakes a panaglako ken panagusar ti shabu wenno marijuana.

Ti saludsod: Apay ditoy luglugartayo nga Ilocos Norte, apay mabilbilang laeng a drug personalities ti bulontaryo a simmuko ken ni Apo Mayor wenno ti polisia bayat a maisursurat daytoy nga artikulo? Ania ngata ti rason no pay a nakisang ti bulontaryo nga isusuko dagiti maseknan a drogista? Nalabit, panagbain gaputa mailandayag nukuan ti dakes nga aramidda. Iti sabali a bangir, nalabit panagamak seknan ti personal a sekyoridadda. Numan pay inggunamgunam ti kapolisan a saanda a makasoan no agbolantaryo a sumukoda, haan latta maikkat ti panagduadua.

Ti kapintasan nga aramiden, iwaksin ti panagbain ken panagamak gaputa iti panagin-mamalaki mabalin nga isu ti mangirubo kenka. Kadagiti proprobinsya ken syudad nga ayuyang dagiti drogista, adun kadakuada ti naipalna-aw ken tumangtangaden iti barsanga. Ti takdertayo: Umapaw koma ti makunkuna a “rule of law” haan a “rule of the jungle”.#