Narungsot ti kimat

No makita nga adda panagkimatkimat iti tangatang a buyoganna iti panaggurrood, kayatna a sawen nga umayen ti tiempo iti tudtudo ken nepnep. Ti umuna nga agrag-o, isu dagiti appo a mannalon. Ngamin, danum manipud ti tudo ti kangrunaan a kasapulan dagiti pagtatalonan tapno kasta agbiag dagiti mulmula.

No adda panagrag-o, adda met panagladingit. Ngamin kimat ti kangrunaan a kabusor dagiti appo a mannalon ta isuda ti masansan a biktima iti kimat. Itay nabiit, maysa a mannalon ti pimmusay gapu ti kimat idiay Solsona, Ilocos Norte. Mapanna koma iyapon dagiti tarakenna a dua a baka a naiwayway idiay bangkag idi makimat isuna agraman dagiti dua a dengwenna. Daksanggasat, pimmusay isuna agraman diay dua nga animalna.

Madlaw a nakurang ti pammalagip ken adal a maiturong kadagiti appo a mannalon panggep iti wagas tapno mailiklik ti disgrasia a parnuayen ti kimat. Haan a lunod iti Namarsua ti narungsot a kimat a kas kadaanan a pammati dagiti appo a nagkakauna a babbaket ken lallakay.

Adda sayantipiko a wagas tapno maliklikan ti kimat. Ti ahensia iti PAGASA ken kameng iti Disaster Risk Reduction Management Council tunggal ili ti agbinnulig koma a mangisayangkat ti addang kontra kimat nangnangruna ti dumaya a paset iti probinsia a masansan a pakapaspasamakan ti narungsot a kimat.#