Napateg iti museo

Uppat a duduogan a pasdek ti napagbalin nga agserbi a sabali manen nga ilira iti museo (museum) ditoy Ilocos Norte. Malukatan ida ton Nob.12-14, 2015. Umuna ti Paoay Convent Ruins dita ili iti Paoay, sumaruno ti Balay Dingras idiay ili iti Dingras, Burgos lighthouse museum idiay ili iti Burgos ken Taoid museum ditoy Laoag City.

Amin dagitoy a museo ket proyekto iti gobierno probinsial babaen ti liderato ni Gob. Imee Marcos. Ti gagemna: Tapno ad-adda nga agtayaktak ti Paoay Kumakaway tourism campaign iti probinsya kas pangguyogoy ti ad-adu pay a turista a bumisita ditoy luglugar tayo.

Pondo iti gobierno ti nausar kadagitoy a proyekto pang-turismo. Naggapu ti buis tayo nga umili ti nagastos. Saan met ngata a minil-milyon a pisos ti gatad a nausar ngem kadatay nga Ilocano, napateg tunggal sentimos. Nagling-etan tayo ti pirak a buis a kokolektaen ti gobierno kadatayo iti tinawen kas koma ti individual income tax, amiliar iti dagdaga ken nabalor a sansanikua. Wenno binulan a buis no met maipanggep ti negosio.

Rumbeng ngarud nga ilalaen ken saluadan tayo dagitoy a proyekto museo tapno mataginayon nga agserbi a sarusar dagiti naisangsangayan a baton-lagip maipapan ti historya, arte, kultura ken siensia no adda man. Nabalitokan dagitoy a banbanag a mabuyboya ken maiyadal ti agdama a puli ken sumarsaruno a kaputotan.#