“Motorisgo”

12744362_212016562482812_5253706546079528757_nNarisgo ti agmaneho ken makilubbon iti motorsiklo. Daytoy ti rason a nangputartayo ti baro a balikas a “motorisgo”. Kayatna a sawen ti “motorisgo”: Narisgo ti agmotorsiklo. Dua ti ligayna daytoy a behikulo, isu a masapul ti abilidad a panagbalanse no agmanehoka ti daytoy a klase iti lugan de motor.

Kunada nga arigna a naitanemen idiay sementeryo ta maysa a sakam apaman a sinakayam ta motorsiklo. Kasta ti kinagrabe ti risgo iti agmotorsiklo. Bassit laeng a kamali, agbaliktadka. Uray pay permi ti annad iti dalan, no madamgiska, segurado matumba ta motorsiklo. Sika, agraman inlubbonmo no adda man, di bumurong, maipurwak, maiyarado wenno maibanggol ti ulo iti sementado a kalsada, puon iti kayo wenno ania ditan a natangken a banag.

Naillian a paglintegan ti agusar ti crash helmet no nakasakayka ti motorsiklo nga agdalliasat kadagiti kalkalsada kas salaknib ti ulo no adda disgrasya a mapasamak. Ditoy Laoag City, naistrikto ti implementasyon iti crash helmet ordinance. Ngem idiay Batac City, maiparit ti agusar ti crash helmet no agdalliasatka iti sentro iti syudad. Ti rason, tapno mairupaan ti siasinno man a tao nga agaramid ti krimen nangnangruna dagiti hired killers.

Adun a motorsiklista ti nairisang iti biagda gapu ti aksidente. Ditoy Laoag City laengen, segun kenni Police Traffic Division Chief SPO2 Sean Francis Bugaoisan addan disi-otso (18) ti pimmusay iti dagup nga 1,332 aksidente idi 2015 ken lima (5) ti natay iti bulan Enero ken Pebrero 2016. Kinaliway, kinabartek ken kina-barumbado a panagmaneho ti kangrunaan a rason iti disgrasia, kinuna ni Hepe Bugaoisan.#

 

*Photo courtesy of Paoay Police Station