MONUMENTO PARA OFWS A TAGA-ILOCOS

Pormal a nalukatan iti publiko idi Biernes, Dec. 18, 2015 ti OFWs Shrine wenno monumento a kas pammadayaw kadagiti kakailiantayo nga Ilocano nga Overseas Filipino Workers, migrantes ken balikbayans. Napintas ti disso a nakaipasdekan ti monumento ta masarankan latta iti Laoag Airport Avenue, asideg ti kallukat a rotunda wenno sirkulo iti madama a Bypass Road project ditoy Laoag City.

Prominente a makita daytoy a Shrine kadagiti biaheros a summangpet ti Laoag International Airport nga agturong ti puseg iti syudad ken kasta met dagiti agbiahe nga agluas dita LIA.
Nalabit dinto maliklikan ti panagdagas dita Shrine dagiti appo nga OFWs ken turistas tapno mangsirig ken agparetrato para souvenir photos.

Kinse a rebulto a simbolo dagiti Sakadas ti timmakder dita Shrine. Ti Sakadas ket isu dagidi appo tayo a trabahadores a taga Ilocos nga immuna amin a nagturong idiay Hawaii, USA a napan nagtabas ti unas ken nagburas ti pinia idi dekada 1900s.

Ti Sakadas iti nagbalinen a paset ti nabaknang a kultura ken pakasaritaan iti Ilocos. Daytoy ti kangrunaan a rason a naipatakder ti Monumento tapno agserbi a baton-lagip para ti agdama ken sumarsaruno a kaputotan.

No ibagatayo a baro a bannuar dagiti OFWs ken migrantes a taga Ilocos, tumutop ngarud la unay a maisagot kadakuada daytoy a monumento dita Laoag Airport Avenue.#