Marso 26: Rugi ti kampania lokal

Editorial Logo

Date of Newspaper Issue: March 21-27, 2016 

Adu ti nagagar a politiko lokal nga agkampanian para ti kandidaturada ton May 9 eleksion. Idi koma Marso 25 ti opisial a rugi ti kampania lokal ngem aldaw iti Biernes Santo, nangina nga aldaw kadagiti Katoliko ken Aglipayano, isu nga aldaw ti Sabado Gloria, Marso 26 ti intuding ti Comelec a rugina ti nasa-o nga aktibidades politikal.

Dispensar, no kuna mi nga adda latta dagiti paan-anawa a politiko a nasapa ti parasapasda nga agkampania sakbay ti Marso 26 ta uray no dida ibaga a pabotosanda para iti maysa a posision, makarawa met ti pukol ti bulok a diskarteda.

Itan ta nangrugin ti kampania lokal, adtoy ti sumagmamano a singasing dagiti narway nga umili para kadagiti kakandidatos.

Liklikan koma ti agipaskil ken agipigket ti campaign posters kadagiti pribado a pader, alad ken mismo a pasdek balay nga awan pammalubos dagiti aginkukua. Liklikan koma ti agpatukar iti napigsa ti unina a mobile campaign jingles kadagiti asideg ti pagadalan no tiempo ti eskuela.

Kasta pay kadagiti bisinidad ti ospital ken kabalbalayan nangnangruna ti oras ti siesta iti nasapa a malem wenno pannaturog iti rabii. Kasta pay kadagiti asideg ti simbaan ken kapilya iti ania man sekta ti relihion no tiempo ti misa wenno religious services.

No naringgor iti aglawlaw a parnuayen ti gumgumloong nga aweng dagiti recorded campaign jingles ken slogans no tiempo a dis-oras ti aldaw wenno rabii, nalabit adu ngamin ti maisturbo ken masuron a tatta-o.

Haan koma a mausar dagiti kalsada a daladal dagiti tatta-o para ti campaign meetings ken miting de avance tapno di maka-abbeng ti annayas iti behikulo trapiko.

No esnaben ni apo kandidato dagitoy a singasing, di bumurong a dusaen isuna dagiti botantes inton aldaw iti panagpipili.#