Naikupinen ti tawen 2015. Simrek tayon ti kallikkis a tawen 2016. No ania man dagiti nalidem a paspasamak idi 2015, ipaknitayon ngem ditay liplipatan dagiti imbatina a napipintas nga adal a pagwadan. Di tay maliklikan a talliawen sagpaminsa dagiti negatibo a paspasamak a pakaadawan ti leksion tapno saanton a maulit pay.
Rumbeng a positibo ti isip ken panunot tayo a mangpasangbay ti baro a tawen 2016 tapno kasta agpannuray ti panagdur-as ken balligi iti tunggal addang nga intay isayangkat a pagsayaatan haan laeng a para ti bukod tayo a bagi ngem ketdi para pay ti sapasap a kagimongan.
No adda dagiti maikanniwas nga aramid idi 2015, panawenen tapno balbaliwan tayo dagiti bulok a sistema iti gobierno man wenno pribado a sektor. Ti kangrunaan a rumbeng a madalusan a rinuker iti gobierno ket ti aramid a panag-korap kadagiti pagkabanan iti gobierno lokal man wenno nasional. Riniwriwriw a pisos a kuarta dagiti umili a naibayad a buis iti negosio, dagdaga ken dadduma pay a sansanikua ti mapan ti bulsa dagiti corrupt nga opisiales iti gobierno, pwera delos buenos.
Iti biang met ti pada nga ordinario nga umili, tiempo metten tapno repormaen tayo ti bagbagi tayo. Dagiti drogista, isardeng ti bisio tapno nasalun-at latta ti bagi. Dagiti drug pushers, isardeng ti illegal nga aramid tapno di maikalibuso iti pagbaludan. Dagiti birkog, saanen nga agtakaw pay ket sursuruen ti desente a trabaho. Dagiti hired killers, agpakawan ken ni Apo Dios ket lipatenen ti agkalbit pay ti gatilyo iti paltog. Nalawa dagiti pagtatalonan nga agur-uray kadakayo.
Tawen 2016, ikararag tayo ken Apo Dios a Namarsua ta paraburanna tayo koma ti napintas ken narang-ay a panagbiag. Kasta pay ta kankanayon koma a maiyadayo tayo ti didigra, riribok ken nakana a saksakit. Sapay koma Apo a Mannakabalin amin.#
