Pinunas ti PAGASA iti balikas a Lawin a mausar a nagan iti ania man a sumangbay a bagyo ditoy Pilipinas iti masangnguanan nga al-aldaw. Ngamin narungsot ti Bagyo Lawin. Narway ti dinadael na a pagtaengan, proyektos, inprastraktura ken prudokto agrikultura. Agyamantay ken Apo Dios ta zero casualty ditoy Ilocos Norte. Kayatna a sawen, awan ti pimmusay ditoy Ilocos Norte gapu ti dangkok ni Lawin, kumpira iti sabsabali a disso ditoy Luzon nga adda naireport a natnatay gapu ti nasao a bagyo.
Ti kangrunaan a nadidigraan ket ti biang dagiti appo a mannalon. Nagaradoda, nagmuriskida, nagbunobonda ken nagraepda ti biang iti pagay, nagpertilayserda ken nagpadpadanumda tapno napintas ken nawadwad iti apit. Ngem iti apagdarikmat, nalpay ti abagada, adda dagiti nakalua ken nagsaning-i idi dimmalapus ni Bagyo Lawin. Nadaplag dagiti kapagayan, kamaisan, kanatnatengan ken kasabaan.
Dakkel ti pukaw dagiti appo a mannalon. Rinibribo ti balor dagiti nadadael. Kasta latta ti kalbaryo dagiti appo a mannalon tunggal adda napigsa a bagyo a mangsaplit iti luglugartayo. Tinawen-tawen a kasta ti nalidem a sinaryo. Tumulong ti estado kadakuada ngem adda met limitasyon na gapu ta agkamtud met ti pondo manipud ti pagkabanan iti gobierno.
Dagiti appo mannalon, nairuamdan ken natennebdan iti rigat. Kabaelanda ti bumangon, adda man wenno awan ti tulong iti estado. Naindaklan ti akem da iti panagbiagtayo. Isuda ti agpatanor ti prudokto agrikultura tapno adda taraon a gatangen ken kanen ti tattao. No awanda a parsua nga agsuksokay ti daga, ni la Apo Dios ti makaammon.#
