Published date: December 12-18, 2016
Nakakaalinggaget a madamag dagiti dandani inaldaw a disgrasia iti luglugan ditoy Laoag City ken entero nga Ilocos Norte. Adun a biktima iti aksidente ti nairisang iti biag da wenno nabaldado ti bagida.Kaaduan na kadagiti biktima ket nakalugan ti motorsiklo ken tricycle. Segundarya laeng iti disgrasia dagiti naka-four-wheel a kunada. Masapul koma ngamin a defensive driving ti agpannuray iti kanito nga agmaneho ni apo drayber. Kasta met a buyogan ti kaadda iti disiplina iti bagi, kortisiya iti kalsada ken respeto ti pada a motorist tapno maiyadayo ti disgrasia.
Igunamgunam ni PNP Traffic Division chief Sean Bugaoisan iti Laoag City a kasapulan ti naan-anay a disiplina dagiti draybers iti kanito a mangiturturong da ti lugan kadagiti kalkalsada ken national highways tapno maliklikan ti aksidente iti dalan.
Inbinsabinsa ni Hepe Bugaoisan dagiti paktores tapno nataltaged ti panagmaneho iti lugan a kas ti motorsiklo, kotse, jeep, truck ken amin a klase iti behikulo. Adtoy dagiti sumaganad a paktores a rumbeng a kondisyon iti maysa a drayber: Saan a napungtot, saan a naragsak, saan a nakainom iti arak ken nasimpa iti emosyon ken panunot. Masapul pay a nasidap ti mata 40 meters ti kaadayon na ti sango iti dalan a pagturongan.
Nabagas ken napnuan adal dagita a balikas ni apo hepe. No maipapuso ken maimula koma iti panunot dagiti maseknan nga appo a draybers dagita a patigmaan, nalabit maliklikan ti adu nga aksidente ditoy luglugartayo.#
