Indauluan ti Ilocos Norte Police Provincial Office ti panagpirma ti Peace Covenant dagiti popolitiko ditoy Ilocos Norte a naangay ti uneg iti St. William Cathedral, Laoag City itay nabiit. Sinuportaran daytoy a covenant ti opisina iti DILG, Comelec ken ti simbaan. Napintas ti gagemna daytoy a tignay para ti nalinak, natalna, naurnos ken nakapapati nga eleksyon inton Mayo 9, 2016.
Ti saludsod iti kaadduan nga umili, makapudno ngata dagiti appo a kakandidato a mangtungpal ti linaon iti covenant? Sinsero ngata ti rikna, nakem ken panunot da idi agpirmada ti sanguanan iti naruay a tattao ti uneg iti simbaan?
Awan ti makapugto kadatayo ti linaon iti utekda no diket isuda laeng nga akinbagi. Pribilihioda daytan. Saan nga agpapada ti ugali, prinsipio ken panunot iti tao. Adda akikid. Adda nalawa. Adda kalalainganna.
Sapay koma Apo ta awan ti nailaok a parsua a baribar ti aligusgona wenno paan-anawa iti daytoy a basingkawel iti politika. Patienmi nga agpannuray ti urnos ken kappia iti tunggal maysa agsipud ta nabileg ti kararag ken natibker a pammati tayo ken ni Apo Dios a Mannakabalin amin.#
