Errado a drivers

SAEM NGA UMUKUOK. Di mabubos a liday. Agarubos ti lu-lua. Atong nasindian iti paraangan. Simbolo ti nakaam-ames a trahedya.
Daytoy ti eksenna dagiti nagpasina kadagiti biktima ti Pariir road accident dita Sarrat, Ilocos Norte. Siam a biag ti nairisang.
Kaaduanna ti pimmusay ken nadunor ket estudyante ti Sta. Rosa National High School. Nagpanes ti eskuela ken half-mast ti banderada. Simbolo ti panakipagrina ken panagladingit.
Pasaheros dagiti biktima iti jeepney a nakidinnungpar ti 14-wheeler truck. Arigna kikit lang ti jeepney kontra ti higante a truck.
Gapu ta head-on collision ti napasamak, permi a nakutog ken naipurwak dagiti pasaheros bayat a nagbalbaliktad ti jeepney iti national highway.
Overspeeding ti maatap a gapu ti aksidente. Adda napasamak nga overtaking? Nagerrado ti jeepney driver. Namiskalkuluna. Nagmintis ti driving skill na.
Tay kunada a human error. Uray kasano ti laeng ti maysa a driver, adda panagkibaltang no napiggis, napardas ken napaspas ti panagmaneho iti behikulo.
Awan kas ti naannad ken natanang iti panagmaneho iti lugan. Maladaw ka lang bassit iti minutos wenno oras iti papanam basta makadanonka iti destinasionmo a natalged ken natalinaay.
Sabali met a banag ngamin dagiti drivers ti passenger jeepney, mini-bus, bus wenno tricycle. Innagawan ti pasaheros tapno ad-adu ti mapastrekda a kuarta. Daytoy ti dakes a kababalin dagiti dadduma a passenger drivers, pwera de los buenos.#