Nalasbang a balasitang (basar iti ladawanna iti Facebook). Disisiete anos. Taga Brgy. Casili, Laoag City. Isu dayta ni Dona Mae Doña. Adu a pada nga umili ti mangay-ay ken ni Dona ta nasapa a pimmusay. Koma no natural laeng a sakit ti impatayna ngem saan ta nakakaalinggaget. Isuna ket biktima ti nadamsak a krimen. Nasarakan dagiti Tanod ti bangkayna iti likudan ti kubo-kobo dita paset ti Sand Dune ti Brgy. Talingaan, Laoag City idi bigat ti Lunes, Mayo 25, 2015.
Ni mismo a Dr. Joseph Adaya, city health officer ti Laoag, ti nagkuna nga “over killed” ti napasamak ken ni Dona agsipud ta idi eksaminenna ti bangkay, natakuatanna a nagsagaba daytoy biktima ti agarup 40 a bagkong iti nadumaduma a paset ti bagina. Ania ngata, naka-droga iti shabu wenno marijuana ti akin-aramid ti krimen a mara-demonyo? Di naibaga ni Dr. Adaya no narames wenno saan ti balasitang. Iti pattapatta ti polisia, nalabit a napapatay ti biktima iti sabali a lugar. Napanda laeng inkabil ti bangkay idiay Sand Dune tapno mailibo dagiti inbestigador ken maliklikanda ti hustisia.
Kondenaren dagiti umili, nangnangruna dagiti nagannak daytoy a krimen. Kas pammalagip, masapul a maipakat ti estrikto a disiplina kadagiti annak nga agtutubo. Di mailibak a mas agresibo dagiti bab-balasitang ken bab-barito. Nasken a ditay ipalubos ida nga agballog ti tiempo ti rabii.
Tiempo manen ti klase kadagiti pagadalan daytoy bulan ti Junio. Rumbeng a bantayan tayo ti tigtignay dagiti annak tayo babaen ti husto panangdisiplina kadakuada. Kankanayon koma a patigmaan tay ida nga iga-edda ti agadal ket liklikadda ti barkada a mangi-sungsong iti panagballog, panaginom ti serbesa wenno arak kasta pay ti panagsigarillo. Ti natudio ken nasingpet nga anak, agbanag a napintas to ti masakbayanna.#
