Baro a tawen, Baro a panagsalukag

(ILUKO VERSION)No itay napalabas a tawen 2017 ket naginad, namayyet ken awanan masnop a diskarte iti panagbiag, tiemponan ti baro a panagsalukag tapno ad-adda pay a rumang-ay para ti bukod a bagi, pamilia, kommunidad ken sapasap a pagilian.

Ibilang laengen a bangungot ti dakes a galad a panagturog-turog iti pansitan bayat iti tawen 2017.
Watwatenen dagiti takiag a naruam idi a nakadalakepkep latta uray maur-uramen tay balay iti karruba. Unnatenen dagiti nakakukot a saksaka tapno agturong iti nagasgasat a dana.

Dagiti bisyo a nakaro a panagbarbartek, panagsigarilyo, panagsugal, panagdroga ken panagbabae wenno panakilalake, iwaksin a maminpinsan tapno baro a langa ti natangeg a mangsarabo iti baro a tawen 2018.

No ingget kirmet ti ugali itay naglabas a 365 aldaw iti kalendaryo, lipatenen ti kinakuripot ket warwaren dagiti nalastikuan a pirak iti uneg ti baul tapno iburay ti aglaplapunosan a kinabaknang tapno tulongan dagiti nakukurapay ken marigrigat.

Agsalukag ngem babaen iti nadalus ken natakneng a wagas. Liklikan ti maikanniwas nga aramid a panagpabaknang a mangparnuay ti adu nga atap ken intriga. Ti kinatakneng ket simbolo ti pagwadan a talugading iti maysa a tao.#

*Photo courtesy of happynewyear2018imagesdp.org