Agsasamusam a napigsa a tudo a binuyogan ti saplit iti angin gapu ken ni Bagyo “Ineng” ti nangparnuay ti nagkaadu nga areng-eng dagiti umili ti unos iti tallo nga aldaw ken rabii ditoy Ilocos Norte idi Agosto 20-22 bayat ti nadawel a panawen.
Kaadduanna, layus ti areng-eng dagiti biktima iti bagyo. Dayta layus a kasta la unay ti sinagaba dagiti tattao kadagiti nagduduma a paset iti Ilocos Norte. Di unay narungsot ti angin malaksid kagiti alipugpog wenno tornado a nangdadael kadagiti balbalay ken sanikua.
Idi nagkalma ti panawen, piman dagiti nadidigraan nga umili. Alisto ti ayuda nga inyarayat ti gobierno probinsial, syudad ken municipal. Milyon a pirak iti balor dagiti relief goods a naibunong kadagiti biktima iti bagyo.
Nadagsen a panunoten no kasano a matarimaan dagiti nadadael nga proyekto inprastractura kas koma dagiti nakurkuran a kalkalsada, narba a rangrangtay, nasawang nga irrigation dam, narba a pasdek eskuelan, natumba a pampubliko ken pribado nga estraktura. Kangrunaanna la ngaruden dagiti nalayos a pinagayan ken dadduma pay a nadaplag a mulmula agrikultura. Nalabit umabot ti dua a riwriw a pesos iti balor amin-amin a nadadael a sanikua iti entero nga Ilocos Norte, segud kadagiti opisiales dita Kapitolyo.
Barbareng adda agubbog a kaasi ni gobierno nasional ta mangted koma met ti ayuda. Maipasuli pay la koma ti susik iti politika.#
