Bagyo Carina: Didigra ken grasiaka

Editorial LogoNagkaddua ti epekto a pinarnuay ni Bagyo Carina a nangsaplit ti probinsiatayo nga Ilocos Norte idi Sabado ken Domingo (Hulio 30-31, 2016). Mabalin a kunatayo a didigra, mabalin met nga ibilang a grasia iti langit.

Umuna ti negatibo nga epekto agsipud ta dinadael ni Bagyo Carina dagiti sumagmamano a proyekto inprastractura a kas koma river control dike, pasdek eskuela, kalkalsada ken dadduma pay. Kasta met nga haan a naispal dagiti pinuon iti kaykayo, produkto agrikultura ken pribado a balbalay. Adda pay dagiti report iti panaglayus, babassit a landslide idiay Pagudpud, alipogpog idiay Batac City ken brownout iti entero a probinsia.

Agbalor ti minilyon a pisos ti pagpakauna a balor dagiti nadadael a sansanikua a kukua ti estado ken pribado a sektor. Agkaribuso pay laeng ti Kapitolyo ditoy Ilocos Norte a mangdagdagup amin a pukaw nga imbati ni Bagyo Carina.

Iti sabali a bangir, agragrag-o met dagiti appo a mannalon a gumawgawawa ti tudo. Ibilangda a grasia iti langit ti tudo a pinarnuay ni Bagyo Carina. Ngamin, adun kadakuada ti nangrugin nga agtalon. Agarado, agbunobon ken agraep. Dagita ti makita kadagiti tanap, sinilong ken bangkag. Idi awan ti tudo, agsuysoyaab a rengngat ken tikag ti mangsulek piman ti mata dagiti agsusukay kenni apo daga.

Narwamtayon ti bagyo kas paset ti panagbiag. Nakaiparsuaanen dayta. Annongtay ngarud ti agan-annad ken agkararag ken ni Apo Dios a mangsaranget ti ania man a klase iti kalamidad.#