Nalatak ti kanta nga Iluko a Pamulinawen a kas ti kansyon a Manang Biday, O Naraniag a Bulan, Bannatiran ken dadduma pay a kadaanan a kankanta ni pada nga Ilocano. Antigo a kansyon ngem dinto agkupas dagitoy a kankanta agingga a pagduyosantay ti musika wenno samiweng.
Apay a Pamulinawen ti napili a nagan ti piesta ditoy Syudad iti Laoag? Pamulinawen ti naadaptar a nagan ti Festival eksakto 20 a tawenen ti napalabas. Naadaw daytoy ti paulo iti kanta a Pamulinawen. Segun ti liriksna (lyrics), ilanladayagna ti kinalasbang ti maysa a balasang a sabsabongen ti maysa a baro a napalus ti panagrayona kenkuana. Nasudi ken nasam-it ti nagan ni Pamulinawen a dinanto pulos malipatan uray sadinno man ti yanna a lugar. Nalabit romantiko ti panagpusposo dagiti mamasirib ken opisiales tayo ditoy Laoag agsipud ta pinilida ti Pamulinawen a nagan ti Festival a dandani makabulan a ramrambak ditoy syudad tunggal Pebrero.
Sakbay a naadaptar ti nagan iti ramrambak a Pamulinawen Festival, piesta ni San Guillermo ti nabayag a pagtawtawag tayo ti parambak kas pagdaydayaw ti Patron Saint iti Laoag a ni St. William The Hermit nga isu itatta ti nalatak a nagan ti Cathedral ditoy Ilocos Norte. Maysa laeng nga aldaw ti naisangrat a piesta iti Patron Saint isu ti Pebrero 10. Iti panagtulid ti panawen, nagbalin a makalawas laeng ngem idin ta naadaptar ti nagan a Pamulinawen Festival dandani makabulan ti ramrambak.
Kadagiti pada nga Ilocanos, iti nasken la unay kadatayo ket rarambakantayo ti nasagrado a piesta ni Apo San Guillermo ita ken iti agnanayon. Babaen ti adu a karkararag kenni Apo Dios, kankanayon koma a maispal ti syudad ken ti entero a probinsya iti nakaro a didigra, nakana a saksakit ken bayolente a paspasamak.#
*Photo courtesy of Agserbi 24/7
