Petsa Hunyo 19, 2006 idi maimaldit ti “maiden issue” iti kabarbaro a pagiwarnak tayo nga Ilocos Sentinel a naka-base ditoy Laoag City, Ilocos Norte.
Ita nga aldaw Iti Lunes, Hunyo 19, eksakto a sangapulo ket maysa a tawenen ti napalabas. Anibersaryo ti panagkasangayna a kas maysa a pagiwarnak.
Ti simbolismo iti Numero 11 (Onse) ket landok (steel) kas panirigan dagiti mamaingel nga eksperto. Ipasimudaag ti landok wenno metal iti kinatibker.
Dayta ti agdama ita a prinsipio a pagtatakderan ti Sentinel kalpasan ti nasurok a maysa dekada–ti kinatibker a makisaranget kadagiti adu pay a masangnguanan a pannubok ken karit ti industrya iti panagirakurak.
Naisangsangayan ti aldaw ti “founding anniversary” iti Ilocos Sentinel agsipud ta Hunyo 19 met ti petsa ti anibersaryo iti Laoag City Charter Day ken kasta met Birth anniversary ni nailian a bannuar Dr. Jose Rizal ti nasao nga aldaw.
No adda man naangay ita a tawen a selebrasyon toy nagkaddua a pasken, maigidiat ti Ilocos Sentinel agsipud ta simple laeng ti pananglagipna ti anibersaryona.
Ti kapapatgan a wagas a panangselebrar ti ania man nga anibersaryo ket isu iti panagyaman iti Dios a Narmarsua kadagiti di mabubos a grasia ken balligi nga Ipapaayna. Kasta ti inaramid toy nanumo a pagiwarnak tayo. Nangidaton ngarud dagiti mangimatmaton ti maysa nga offering para iti Misa dita St. William Cathedral, Laoag City. Simple ngem naimpapusuan ken naisagranuan.
Bulon na daytoy ti adu a karkararag a panagyaman ta sapay koma a dinto agressat ti Pannarabayna kadatayo amin ita ken ti masakbayan, partikular dagiti managers, editors, reporters, writers, contributors, valued readers, subscribers ken advertisers.#
